أغنيه ( أسف يا باشا )

أسف يا باشا .. أسف يا كبيري .. ما انا اللي غلطان و انتا اللي سيدي

ما غلطي راكبني من سكوتي .. راكبني من ضعفي و قلة صوتي 

ساكت بعد أول كلمه نطقتها .. ساكت بشريطه انتا نسجتها

و ليه ممكن أقول .. مدام صوتي مش مسموع

أزعل , أغضب , أكسر .. برضه مش مسموع


عايزني أضعف , أكش , أطاطي 

عايزني من الهم ألح و ادادي .. و أبقي نسخه صنم راضي

لا يا باشا .. مش عشان انتا باشا .. تخليني لعبتك

أتجبرت تبقي انتا كبيري .. بس مش همشي في سكتك #just_سطور

أغنيه ( أنا شاب في ال 30 )

أنا شاب في ال 30 .. و لسه بخبط شمال و يمين
وفاكر نفسي خلاص عديت .. و وصلت لهدفي البعيد
في شغلي مفحوت .. و في حياتي ملخوم
معلوم بدور علي إستقراري .. بس إزاي و أمتي و مع مين
ما وقتي علي طول مسروق .. و ضهري من نصه مقسوم
مع كل ده بحمد ربي .. و مستني
ما لسه بدري .. ما انا شاب في ال 30 #just_سطور

 

أغنيه ( أنا مصري الدراويشي )

أنا مصري الدراويشي .. مواطن مدفون .. نفسه يإب و يقوم
أنا اللي في السياسه فهمي علي قدي .. لا تقول لي ولا تعيد لي
هتيجي تسألني إخوان و لا فلول .. هقولك يا عم ما تجيب بجنيه فول
هتقولي دي ثوره ولا إنقلاب .. هقولك هو العيش النهارده بكام
هقولك أكلني و بعد كده فهمني .. هقولك أنا عايز أعيش , أرتاح و كمان عينيا تغمض و تنام
هقولك علمني , عيشني , سترني و كمان عالجني .. يا سيدي طب حتي قومني .. ده أنا تحت أووي و دراويشي #just_سطور

 

أغنيه ( أنا اللي لسه )

أنا اللي لسه .. أنا اللي هابقي .. أنا اللي حلمي بيكبر بالزقه
واحده واحدة أيوه عارف .. بس تكفي إني هابقي
مهما تعند .. مهما تقفل .. برضه عارف إني هابقي
عايزني أسكت .. عايزني أخضع .. أييه يا عم فاكرني عبدك
مش همشي كوني بأمرك .. ولا حزامك هيبقي طوقي
أنا اللي هاكتب حلمي بدمي .. أنا اللي راسخ صمدي بعندي
أوعي تيأس .. أوعي تحزن
و لما تبعد .. ارفع إيدك و إدعي ربك
ما هو جنبك و هيبقي سندك .. لما تبقي و لما توصل #just_سطور

رساله الي روح .. مطلوب توصيلها للفردوس

بابا حبيبي .. وحشتني أوي .. نفسي كل كلامي و احساسي يوصلك .. نفسي أطمنك عليا بس للأسف .. انا من بعدك شوفت كتير .. و عدي عليا من سلاله أشرار البشر كتير ..بس ده وقفني علي رجلي مضعفنيش .. بس احساسي بالأمان راح معاك و مجاليش .. عرفت من بعدك يعني أيه أخاف .. يعني أيه عيني تبقي حوالين نفسي من خوفي في كل مكان .. اتعلمت أقفل أنا باب شقتنا بالمفتاح .. ده انا مكنتش عارفه حتي شكل المفتاح و أنا معاك .. و لما انزل بقيت بقفل ازاز العربيه اوي .. أأه بقفله اوي .. ده حتي يا بابا الهوا مبقتش بحس بيه .. أحس بيه ازاي من بعدك !! .. بضحك أأه بضحك .. بفرح أأه ممكن أفرح .. بس مش زي لما كنت معايا ..ما أنا دلوقتي بفرح و أضحك بحساب .. و مع كل ده اللي مصبرني اني بحسك حواليه في كل مكان .. بتصبرني .. بتطمني .. و اكيد بتدعيلي .. و انا اكيد بدعيلك .. رحمك الله يا أبي و جعلك في الفردوس الأعلي #just_سطور

أغنيه ( روميو الألعوباني )

أنا اللي كنت في زماني .. روميو الألعوباني
أنا الواد الفيتك .. و زماني هو اللي جاني
أنا اللي سيبت لارا .. لما كنت مع يارا .. عشان أظبط الجامده ساره
وانا اللي لفيت و رحت و جيت .. و فرحان بنفسي أوي قال أيه عديت
ما أكيد عديت !!
مش كسرت قلب دي .. و دست علي جرح دي .. و سيبت دي و دي
بس أمتي يا زماني ترجعلي تاني .. ما راحت عليا بكل حاجه فيا
و بقيت شبه اللي مستني طلقه من معاشه اللي نداهله .. وجاله #just_سطور

 

عزيزتي كاندي كراش

عزيزتي كاندي كراش .. سيتذكر التاريخ إني كمواطنه مصريه .. لم أقم بلعبك و لو ليوم واحد .. و أحب أقولك كلمتين : أنا لا بحبك و لا نفسي العبك .. و مش شايفه فيكي أي إندهاشه يا كوكو .. و مهما زادت الضغوط من أهلي و أصحابي عشان أعبرك و العبك .. و ده طبعا عشان أبعتلهم أرواح و طوفي و فوندام .. متحوليش يا كاندي نوو وااي #just_سطور

 

أغنيه ( كنت فاكراك طيري )

كنت فاكراك طيري .. و في قلبي بنيت لك بيتي .. بس يا خساره هديته بأيدك .. هديته بعندك و حبك لغيري .. هديته لترضي غيري .. غرورك نساني حتي عنوان بيتي .. بيتنا اللي كنت فاكراك هتبقي فيه طيري #just_سطور

 

كبسولات الحياه

أنا إكتشفت ( كبسولات الحياه ) أيووون كبسولات للحياه .. كبسوله الترقعه , كبسوله التهييس و التنفيض .. و فيه بقه برشام نسيان الهموم و ده بقه مفعوله هايل مقولكوش لازم تجربوه .. و اللي هيجي يسألني بيتباع فين هقوله ( هذا المنتج غير مخصص للبيع ) #just_سطور

قالولي يوم

قالولي يوم .. خوديها في الحياه حكمه .. عايزه تعرفي تعيشي .. أقفي فوق خشبه مسرح و عيشي .. أضحكي للوشوش .. إبعدي عن بركانك و أحزانك .. إدفني عيوبك و ضعفك بإيدك .. و اللي جواكي ملكك و ليكي #just_سطور

المخ البشري

المخ البشري بقي عامل زي الخلاط .. و من كتر الخبط و الرذع و اللف و الدوران .. بقي يطلع أحلي شغل والله ..يعني مثلا (مشروب الكأبه) و ده بينتج بأعلي جوده .. ولا (مشروب الإحباط) وده بينتج علي حسب ظروف المخ النفسيه .. و مقولكش بقي علي (مشروب القلب الحزين) و ده بينتج بكثره نظرا لظل الظروف الحاليه .. و يجي بقي (مشروب السعاده) شاحح في السوق و هيتعملو دراسه جدوي لزياده و ضمان المنتج  :) #just_سطور

أغنيه ( حلم مدته دقيقه )

غمضت عينيا .. وقت الشتويه .. لاقيته قدامي واقف قصاد عينيا .. حسيت بوجوده .. و من دقات قلوبنا وصلنا لسابع سما .. نداهلي و وشوشني و قالي كلمتين .. سمعته و صدقته أوي .. ومن فرحتي مسألتوش حتي أنت مين .. و فجأه .. صحيت علي أصوات و دوشه .. و لاقيت بين إيديا مخده .. رجعت غمضت عنيا .. غمضتها أوي .. و نداهت عليه بس لاقيته أختفي .. ساعتها عرفت الحقيقه .. وإنو كان حلم .. مجرد حلم مدته دقيقه #just_سطور

و أخدنا كاس العالم

و أخدنا كاس العالم ..الحقونا اسندونا ..لولولي ..انجدينا يا انشراح اللي جاي بقي أفحت من اللي راح ..يا خراشى ده حلم ولا حقيقه ده يا ولاد .. اييه ده !! .. خير الله ما اجعله خير .. دي هواجس و تهيؤات ملناش دعوه بيها يا شباب .. كله يرجع تاني يتغطي كويس وينام :) #just_سطور

 

أغنيه ( أنا المواطن )

أنا المواطن .. وليا حق أتواطن في حته مني .. مش من حقك تبعدني .. تقهرني .. تأسرني .. ولا حتي تخرسني .. عايزنا نقف و نستني ورا طابور مالوش أخر .. عايزنا نعيش عبيد ونموت برضه عبيد .. ماتحولوش .. لا هتجبرونا ولا تستعبدونا #just_سطور

اللي ما يتسمي و المقهوره دائما 4

المقهوره دائما : بيبي أنا زهقانه
اللي ما يتسمي : حبيبتي المسلسل التركي بتاعك إبتدي .. شوفيه
المقهوره دائما : مممم يا بيبي بقولك زهقانه اووي
اللي ما يتسمي : زهقانه .. طب قومي أعمليلي كوبيه شاي و ساندويتشين جبنه رومي لاحسن جعان موت
المقهوره دائما : جعان أييه .. أنا عايزه أخرج بقه
اللي ما يتسمي : تخرجي أيييه يا حلاوتهم .. مش لسه مخرجك الشهر اللي فات
المقهوره دائما : قصدك تقول من أربع شهور
اللي ما يتسمي : تصدقي يا مقهوره إنتي ولييه نكديه سديتي نفسي .. مش واكل .. و هدخل أنام و سيبيك
طبعا بعد ما مقهوره دمعت دمعتين .. إتكعورت في الكنبه .. و شافت المسلسل التركي و هي مفتوره .. و كلت هي ساندويتشين الجبنه الرومي  :) #just_سطور

أنا قلبي غبي

أنا قلبي غبي .. عارفه انو غبي .. لا بيفهم ولا يعرف غير انو يتكوي .. مشاعر اييه .. و حب اييه .. أفهم بقي يا غبي #just_سطور

 

أنا اللي لسه

أنا اللي لسه .. انا اللي هابقي .. أنا اللي حلمي بيكبر بالزقه .. بس تكفي إني مصدقه و عارفه ..إني هابقي و أبقي #just_سطور

بحلم و نفسي أوصلك

بحلم و نفسي أوصلك .. من ورا سور عالي متشعبط .. واقف بس من جوايا متكسر .. أيدي لفوق و حامد ربي .. أني لسه بحلم .. و لسه نفسي #just_سطور

الناس أنواع

الناس أنواع .. زي الألوان ..فيهم غوامق ميتعشروش .. و فيهم فواتح و في زمانا ده مايتلاقوش .. و النص نص تايهين بقه و دايخيين و مايتسابوش #just_سطور

 

عزيزتي انجلينا جولي

عزيزتي انجلينا جولي انتي لييه مستاءه ? .. كل ده عشان براد بيت خانك .. طب هقولك علي حاجه .. أنتي ناسيه لما كان متجوز جنيفر انيستون ما سعتها خان الغلبانه معاكي و أطلقو كمان بسببك يا مفتريه .. و لا هو حلال فيها و حرام ليكي أنتي .. عزيزتي انجلينا أحب أقولك علي حاجه لازم تتعلميها كما تدين تدان .. و الدنيا دواره .. و يابخت من بكاني و مضحكش الناس عليا .. بس برده أنتي اللي غلطانه متجوزتهوش لييه ? هااه .. فالحه بس تربطيه بي اورطه عيال زي الستات الكيوت المصريه بتوعنا .. أهو يا هبله لاخمتيه و أتلاخمتي أنتي كمان .. و في الأخر خانك مع مزه جديده :) #just_سطور

على رأى المقهوره دائما

على رأى المقهوره دائما : الرجاله شكلهم ماتو فى الحرب .. و اللى اتبقو بقو للعرض #just_سطور

 

علي رأي اللي ما يتسمى

علي رأي اللي ما يتسمى : البنات زي الرز .. بس اللي يعرف ينقيه #just_سطور

قوم و خود

قوم و خود من الدنيا أحلي ما فيها .. بس ماتحيفش .. وسيب حته لغيرك #just_سطور

فيك ولا فييا

المشكله مش فيك ولا فييا .. المشكله في زمانا و مكانا .. ضمير و عقول غيرنا .. حتي اللي جوانا مبقاش لينا .. ده بقي ليهم .. ما هو بحكمهم بقينا أنا و أنت ماشيين و عايشين ليهم مش لينا #just_سطور

إنت ليك فيا

إنت ليك فيا .. و أنا ليا فيك .. و اللي فيا و بيا محتاج ليك #just_سطور

اللي ما يتسمي و المقهوره دائما 3

اللي ما يتسمي : حبيبتي يلا عشان منتأخرش
المقهوره دائما : أوكي يا بيبي هاجيب شنطتي بس
اللي ما يتسمي : أييه دا !!
المقهوره دائما : بيبي أييه في حاجه ?
اللي ما يتسمي : أييه اللي أنتي لابساه ده !!
المقهوره دائما : ماله يا بيبي وحش
اللي ما يتسمي : وحش أيه يا مقهوره ده زفت
المقهوره دائما : زفت أييه يالي ما تتسمي اءاءاء .. قصدي يا بيبي ده جميل
اللي ما يتسمي : جميل ده يبقي (تييت) .. أنتي مش خارجه مع سوسن .. دقيقه يا مقهوره و تكوني مغيره و سبقاني علي العربيه
معلش بقي يا مقهوره انتي و سوسن كمان برضه متزعلوش .. أصل اللي ما يتسمي قال أييه عامل نفسه شرقي #just_سطور

أنا المضطر

أنا المضطر أبعد عن حياتك .. و ساكت .. بس مصدق إن ليا في ألف باب و سكه مكان يتساكن #just_سطور

بكره خوفي

أنا بكره خوفي و ضعفي اللي جوايا .. علي كل اللي عايزاهم جنبي و معايا #just_سطور

الكلمات دي

الكلمات دي .. أنا عمري ما سيبيك يا بنتي ده وعد .. أنتي أحلي حاجه حصلتلي .. أنتي تستهلي حد أحسن مني .. كلمات لن تفهمها إلا المقهوره و أختها و بنت خالتها و بنت عمها و عمتها .. ده حتي عمتها ذات نفسها حفظاها و ممكن تسمعها #just_سطور

بنتولد

بنتولد وبيحطونا في لفه .. و بيفرحو بينا بي أول خطوه بنمشيها وبأول لفه .. و بنعيش و نشوف الدنيا بي ميت لفه و لفه .. و لما نموت برضه بيرجعو يحطونا في لفه #just_سطور

اللي ما يتسمي و المقهوره دائما 2

اللي ما يتسمي : surprise حبيبتي عجبك الورد
المقهوره دائما : ورد !! غريبه يعني !
اللي ما يتسمي : طب أيه رأيك في الساعه ال guess دي تحفه صح
المقهوره دائما : ساعه كمان !! ده أنت أخرك ساعه Quartz من علي رصيف العتبه
اللي ما يتسمي : مالك يا مقهوره يلا بقي عشان ها نخرج
المقهوره دائما : لاااا أنت مالك النهارده ! قول .. أنت عملت أكيد مصيبه
تصدقي يا مقهوره إنت ولييه نكديه .. بقولك أيه يا اللي ما تتسمي طلق الست دي و خلص بقي #just_سطور

أنا ميين

أنا ميين .. أنا من جوايا أتنين .. واحد والتاني دايما خلف خلاف .. أنا الخير ولا الشر .. الحب ولا الكره .. أنا اللي بَدِي ولا اللي بحب أخد .. أنا مين .. أنا من جوايا أتنين #just_سطور

أنا اللي لسة

أنا اللي لسة هشوف يوم جديد .. أنا المتفائلة .. و اليوم زي ما تخيلتة هييجي .. هييجي كمان يوم او يومين .. صدق .. صدق أكيد #just_سطور

اللي ما يتسمي والمقهوره دائما 1

اللي ما يتسمي : أنا بحبك
المقهوره دائما : بتحبني قصدك تقول كنت بتحبني
اللي ما يتسمي : بقولك أنا بحبك
المقهوره دائما : أنت أتغيرت و مابقتش اللي ما يتسمي اللي أعرفه
اللي ما يتسمي : والله بحبك
المقهوره دائما : ما تحلفش أنت كداب كدااااب
اللي ما يتسمي : و حياه أبوكي و اللي جابوكي بحبك يا غبيه
و هيفضل يحلف و يحلف .. لا هي هتصدقه .. و لا هو هيقول الحقيقه :) #just_سطور

أوفر دوز

الشخص المجروح و جرحه ما يتوصفش من قوته .. بيبقي عامل زي المدمن اللي حاصله أوفر دوز .. بيحس روحه و حياته بتنسحب منه بعيد .. و أن كل حاجه بتختفي من حواليه .. بيبقي محتاج يكون في الديتوكس عشان أدمانه و جرحه يطلع منه واحده واحده .. و يرجع أنسان تاني من أول و جديد #just_سطور

تبآ للمسلسلات التركي

تبآ للمسلسلات التركي .. أيوه تبآ .. اللي خاليتنا فاكرين الدنيا كلها بينكي و فوشيا و روز .. و الرجاله بشنب حلويين و بيحبو بجد .. و الورد أييه بقي في كل حته .. و الخروجات و الفسح يااه موجوده .. ريلي ريلي تبآ #just_سطور

خيط

ما بين الحقيقه و الخيال خيط .. أنت اللي ماسكه .. أنت اللي متحكم فيه .. تقدر تقطعه .. تقدر تخلي خيالك حقيقه .. أو ممكن تخلييه .. و ساعتها المسافه هتزيد .. و عمرك ما هتحقق حلم حلمت بيه #just_سطور

خلص الكلام

خلص الكلام .. كلمه بنقولها كتير من جوانا .. بنهرب بيها .. بنبعد .. بنفتكر كده أرتاحنا .. بنقول بيها لنفسنا هو ده الحل ما خلاص .. خلص الكلام .. #just_سطور

بكره السكوت

أنا اللي بكره السكوت وقت مفروض فيه الكلام .. أنا الكلام اللي مكتوم جوايا من كتره ما بقاش لييه وقت يتقال #just_سطور

بحلم

و أنا لسه بحلم .. بحلم بيوم من أيام زمان .. يوم من كتر حلاوته ما يتنساش .. يوم كان لسه فيه الصحاب صحاب .. و العشره و الأهل و الأحباب #just_سطور

خروجات البنات فقط

في خروجات البنات فقط .. الويتر في الكالفيهات أتغيرت شغلته خالص .. يعني مثلا بدل ما بقينا نقوله لو سمحت ممكن واحد كابيتشينو ويذ كراميل فلايفر .. بنقوله لو سمحت ممكن تصورنا كلنا صوره حلوه .. ومش صوره واحده بس ده أحنا البنات بنعذبه و بنهري الراجل صور #just_سطور

كلاكيعك

مشاكلك همومك أحزانك يعني كل كلاكيعك .. جيبهم و أكتبهم في ورقه أي كلام .. و بأقلم أسود شخبط عليهم شخبطه مش أي كلام .. شخبط يمين شمال و فوق تحت .. و مفيش مشكله لو بالورب كمان .. و بعد كده كرمشها كويس ومن الشباك و أحدفها .. زوووو .. ورايح نفسك خالص #just_سطور

مريض نفسي

متستغربوش كلامي .. بس جوه كل واحد فينا شخص تاني مريض نفسي .. أيوه مريض نفسي .. بيكبر جواه واحده واحده من و هو صغير واكيد بيتأثر بيه .. بس السؤال بقي ? .. عارف تتأقلم و تعيش و تنجح و هو معاك .. عارف تهزمه أو علي الأقل تعالجه .. الأجابه عندك أنت #just_سطور

أمل

النهارده يوم جديد إبتدا وانت لسه عايش .. صحتك كويسه .. أهلك بخير .. لسه ممكن تضحك .. يعني في فرصه تانيه .. يبقي في أمل #just_سطور

مصلحه حكوميه

لما بروح أي مصلحه حكوميه في بلادنا مصر الحبيبه .. بأكتشف أننا عايشين وسط كائنات فضائيه نزلولنا من كوكب بوحلق المبهج و ده هتلاقوه شمال كوكب الأرض علي طول .. بس علي هيئه بشر ليهم أتنين أيد و أتنين رجل .. أأأه وحياه ربنا منازليين نسخ شبهنا عادي .. لا و كمان بيتكلمو مصري زييينا #just_سطور

البنت لما حبيبها يسيبها

البنت لما حبيبها يسيبها تلاقيها قصت شعرها .. بس الولد بقي تلاقيه غطس كده شويه .. هي ساعه ساعتيين بالكتير .. وده طبعا وقت طويل للنسيان .. و بعد كده تبدأ حمله التفتيش علي شله الفساد القديمه اللي أتركنت شويه حلويين .. و أنتم عارفيين الباقي .. و فعلا الباقي أعظم #just_سطور

المرايا

المرايا هي الوحيده اللي مش هتعرف تخبي عنها أنت حاسس بي أييه #just_سطور

هو لييه

هو لييه مفيش قهوه مابيتسهرش .. و شكولاته مش بتخن .. ولييه البيتزا مش مفيده .. طب والبيبسي مينفعش يبقي جميل و هيلثي .. هو أحنا كده منحبش الا اللي يضرنا :) #just_سطور

نفسي أشوف

نفسي أشوف الدنيا حلوه .. وألاقي فيها حاجه تسوي .. كل ما تضحك شويا و أقول خلاص هتروق و تحلي .. وأدي زوبه ذقه .. و ذقه ذقه .. و ترجع زوبه و يااا دي الخيبه .. لييه كدا يا زوبه طيب .. ما أنتي كنتي حلوه .. بصو أنا معاكم هي نظره تشاؤميه بس واقعيه #just_سطور

أنت ميين ?

أنت ميين ?? .. تفتكر أنت ممكن تعرف أنت مين .. تعرف أنت كويس كده و طيب و أبن حلال ولا عكس كل ده ? .. مين قالك بقي ? .. الناس ? .. الناس هما اللي بيقولولي كده والله .. أأأأه قولتلي .. يعني رأيهم هو اللي بيهمك و بتصدقه ? .. أذا كان هما مش عارفين نفسهم هيعرفوك أنت .. يا هبل .. و أنت عارف و أنا عارفه أن الدنيا مصالح .. و المصالح بتتصالح .. و كلو بيضحك علي بعضو و بيجامل برضه بعضه .. فا متضحكش علي نفسك أنك عارف نفسك #just_سطور

في حياتي

في حياتي .. عدي عليا ناس كتييييير ملهومش أي لازمه .. بس بجد مندمتش علي معرفيتهم خالص .. ده بالعكس .. بسببهم عرفت أنا بقيت عايزه أيه حابه ايه .. وأكتشفت نفسي من أول و جديد .. شكرا أيها البشر .. شكرا يا ( اللي ملكومش لازمه ) ميرسي #just_سطور

لكل حد

لكل حد فاكر نفسه هو اللي مهموم و مقهور بس في الدنيا دي .. و لكل بنت شايفه انها مجروحه و وحيده في زمانها و هي الطيوبه البريتي اللي مفيش ولا هيجي زيها في الكون .. و البرنسات المرسوسين المفحوتين شغل و مرماتا يا عيني حتي في حبهم البنات الوحشين مقدرهومش و طرقعلهم يا حرام .. و لكل ست الكل و بابا الحج اللي شايفين أن ولادهم ضايعين و حظهم متكعبل .. يا ريت تفوقوا بقي .. إنتم مش لوحدوكوا هنا علي فكره .. ما بقاش في ظالم و مظلوم .. كلنا طلعنا زي بعض .. عندنا نفس الأحساس نفس الألم .. بس الرك علي اللي يفهم و يعرف و يعيشها #just_سطور

فقط و حصريا

في شوارعنا فقط و حصريا .. تيجي تنزل .. تلاقي الوشوش كلها حزن و كأبه و هم بس .. تصدقوا نفسي أشوف حد بيضحك .. لدرجه أني لو لقيت وش بيضحك حاسه أني هستغرب والله .. بجد وشوشنا بقت صعبانه عليا أووي #just_سطور

عجائب و قدرات أهلي

من عجائب و قدرات أهلي القديمه و العجيبه .. و أنا صغيره لما كنت بنام علي الكنبه و أتفرج علي التليفزيون ولا مرميه علي أي بوف في الأرض و أروح بقي في النوم .. سبحان الله و فاجأه .. بغمض عين و أفتح عين .. و هوبا بصحي ألاقي نفسي تاني يوم في سريري عادي جدا .. أزاي و أمتي ? .. أنا لحد دلوقتي والله ما أعرف .. ده أنا أهلي دول ونبي أختراع :) #just_سطور

ماي ديير حظ

ماي ديير حظ .. أنت فيين ? هاااه .. سايبني و رايح فيين ? هاااه برضه .. هو أنا زعلتك في حاجه طيب ? .. ما تيجي يا عم شويه كده و حششتنا والله .. لحسن كدا كتير عليا .. طب حتي تعالي سلم .. ما تيجي تشرب شاي ولا تضرب كنزايا بيبسي كولا حتي .. انت أيييه يا عم الحج مش بيتجي ?? :) #just_سطور

رغايين و لتاتيين

مهما كنا رغايين و لتاتيين .. و حواديتنا متنطوره هنا وهنا .. و مفيش ورانا غير نكلم ده و نقول لي ده .. هيفضل جوانا سر صغير .. لا بنقوله لحد و لا ممكن في الكون حد هيعرفه .. ده حتي لنفسنا لا بنحب نفكر و لا نفضفض بيه #just_سطور

أحساس كبير

بجد جوايا أحساس كبير بيربطني بيك .. و مابقتش أقدر عنك أغيب .. و كل ما أقول والله لازم أبعد عنك و أمشي بعيد ..و أقول لنفسي خلاص كدا كتير .. خودي قرارك و سيبيه .. بلاقي حاجه ترجعني و تخليني أمسك فيه .. بس أعمل أييه ما هو برده عشرت أيام و سنين كتير .. يا موبايلي نفسي من بين أيدي تسيبني و تروح بعيد #just_سطور

الأقنعه

الأقنعه عماله بتقع من علي الوشوش .. و الوجوه كلها بتبان و بتقول كلام و كلام .. بس هيجي يوم أكيد و نشوف وشوش مابيتدراش ورا قناع #just_سطور

الحته الزايده

طول ما لسه في قلبك طيبه في الزمن ده .. هتطلع من حفره تقع في شوال متلعبك متقطع متشحور .. فبلاش منها والله الحته الزايده اللي في قلبنا ده #just_سطور

ليل الشتا

علي قد ما وحشني أووي المطر وريحته .. وبرد الشتا علي قد قوته بس بحبه .. حتي صوت الهوا في شديته .. بس في دايما أحساس بالحزن و الخوف بيربطني وبحس بيه في ليل الشتا معرفش لييه .. بس حتي أحساسي بخوفي ده بستناه و بحبه #just_سطور

أوعي تكبر

نصيحه مني أوعي تكبر .. لأنك من الحزن هتتعب .. و الهم هيركبك و يلبد .. و التفكير هيخلي شعرك يضرب .. فا أسمعها مني متكبرش أحسن #just_سطور

اتنين حبيبه

ما بين أي اتنين حبيبه
هي تعجبه .. يروح يقولها
يحبها .. برضوه يروح و يقولها
يفضل بقي يحبها .. و هي كمان تتشدله و تحبه
تليفونات بقي صبح و مسا .. و شكولاتات و ورد و هدايا رايحا جايه
يبتدي المهرجان و المولد يهدي واحده واحده .. و الحياه تبرد و تهدي
المشاكل و الأفشات تبتدي تظهر .. الخوف و القلق يزيد
هي تتصل .. و هو يرد
هي تستحمل .. و هو يتلكيك
هوبا القنبله تفرقع .. و الموضوع يتفجر و يبوظ
حد ما بينهم يمشي و يعيش حياته .. و التاني بقي يتفرج عليه #just_سطور

اللي عايزينه بيروح

لييه اللي عايزينه بيروح .. و اللي مش طايقينه بيلبد و يلزق فينا بغرا مش بيروح .. ما كدا بقي كتير علينا كل اللي بيجي و يحط علينا :) #just_سطور

مش بيبسطنا

هو أحنا ليه مش بيبسطنا و يفرحنا الا كل حاجه بعيده أو صعبه .. و مبيرضناش و يسعدنا الا اللي مش في إيدينا .. و ده يقولنا أننا بنحب نتعب و نوجع قلبنا #just_سطور

أوقات بننصح

أوقات بننصح و نقنع غيرنا بكلام كتير عشان من مشاكلهم يهربو .. و مع نفسنا لا بنقدر نقتنع ولا نسمع حتي الكلام اللي كنا قلناه .. و تفضل كلمه واحده بترن في ودانا .. الكلام مفيش أسهل منه #just_سطور

بلوك للحياه

بلوك للحياه .. ودليت للبشر .. تعيش مرتاح .. لا حزن ولا غضب #just_سطور

عالم صغير

نفسي أعيش في عالم صغير يكون ملكي أنا .. يكون فيه الناس اللي بحبهم بس ..من غير حزن و كره و حقد .. و يبقي جواه شكولاته , أيس كريم ,قهوه , بيتزا , اير هوكي و شوبينج وبس علي كده #just_سطور

خطه مستقيم

اوعي تفتكر إنك هتمشي في طريق خطه مستقيم .. هتيجي شويه يمين .. و شويه هتكون فوق سلم عريض و كبير .. و أيام تقع في حفره و طلوعها هتفتكرو مستحيل .. فا إمشيها و عيشها و عديها .. هتتبسط فيها و بيها #just_سطور

القهوه الشبح

القهوه زي ما ليها كفاءتها اللي بنعشقها .. هي الشبح اللي بسببه بتفضل عيونا متشعلئه في سقف أوضنا و مفنجله :)  #just_سطور

في ناس

في ناس لازم نعملهم refresh عشان نقدر نكمل معاهم .. و ناس بنتحول قدامهم ل update عشان نعجبهم .. و أكتر ناس بقي لازم نعملهم delete و دول بقي مفيش أكتر منهم :) #just_سطور

الناس في الزحمه

الناس في الزحمه .. مابقوش بيحسوا بالزحمه من كتر الزحمه ..و إذا كانت الزحمه مش حاسه إنها زحمه .. زحمه يا دنيا زحمه .. دربكه :) #just_سطور

أوقات السكوت

أوقات السكوت بيقول كلام كتير .. أحسن من كلام رايح جاي متحسش بيه #just_سطور

الأسيتون

نفسي زي ما الأسيتون بيشيل المانيكيير .. نلاقي أسيتون يشيل الرخامه و الرذاله و الوحاشه عند الناس ناس وحشه_أأأجدع :) #just_سطور

تاك كير

الحياه عامله زي القطر اللي إتفكيت قضبانه .. فا تاك كير يا بشر الدنيا لا بتقف ولا بتستنا حد :)  #just_سطور

لييه ممكن تزعل

لييه ممكن تزعل .. لما ممكن متزعلش خالص .. إمشي طريقك و عديه .. دوس علي مشاكلك و قلقك و خوفك .. و هاتدعولي :) #just_سطور

عادي

عادي .. عادي جدا إنك تبقي عادي في زمن العادي فيه إنو عادي .. ولو جيت تغير العادي هتلاقيه راضي و هادي و حابيب إنو عادي .. #just_سطور

أنا لوحدي

 

أنا لوحدي و في حالي بس مرتاح .. أأه نقصني شويه زحمه تشغل و تدوش دماغي .. بس أريح من كركبت فكر و بال .. يوميات_شخص_متلخبط #just_سطور

عن ناس

عن ناس منحسيش بيهم الا ما يسيبونا .. و ناس معانا و مش عايزنهم ويانا #just_سطور

هرقليز و زينا

فاكرين هرقليز و زينا .. دول ياما جابو جنون للعيال و خلوهم يخلعو رجول كراسي البيت و عملوها عصيان و سيوف .. و لفوا غطيان حلل البيت حوالين وسطهم قال أيه قميص واقي .. كنا عيال غلابه أووي يا خال #just_سطور

الشوكلاته

الشوكلاته هي سر سعادتنا و عشقنا .. يعني عايز ترشينا , تضحكوا علينا بكلمتين , تفرحونا أووي , تتمصلحوا مثلا .. من الأخر مفيش سلاح غيرها #just_سطور

قلوب مقفوله

في ناس بنحس بدقات قلوبهم حتي لو فرقونا .. وناس حتي لو معانا قلوبهم مقفوله حتي صوت صداهم مش مسموع #just_سطور

الكحل

في حزننا .. بيرسم الكحل خط بيحلي عيونا .. بس لا يقدر يداري دموعنا .. و لا يخبي جروحنا #just_سطور

نصيبنا

نصيبنا عمال يمطوحنا .. لا بيودينا ولا بيرضينا #just_سطور

للفرحه سكه

في ناس مش عارفين للفرحه سكه .. و ناس واخدين للحزن ألف حجه و حجه ... #just_سطور

شنب

الراجل من غير شنب .. زي البنت من غير حلق .. و بقينا في زمن السورتيت يا مان .. و الألفاظ ال (التييت)في بوءيك علي طول يا سنيه ينفع كدا !! #just_سطور

نسخه من حد

أوعي تبقي نسخه من حد .. أو شريط قديم متسجل عليه .. أصلك متضمنش قد أيه بكره الشريط متلعبكه و متدربكه .. قوم و أسحب شريط حياتك لونه و شكله بطريقتك أنت #just_سطور

عبيط وغلبان

لكل حد بيحن لصاحب كان عشره سنين .. أو حب عدي عليه أيام كتير .. واللي أيده علي خده مستني ذكرياته ترجعله و تاخده بالحضن .. أحب أقولك كم أنت عبيط و غلبان أيها الإنسان #just_سطور

الولاد و العربيات

بضحك أوووي .. علي الولاد اللي كل تفكيرها في العربيات .. و بوص إلحق الواد مودي جاب الحته الجامده .. لا يا عم شوف بس حماده هجييب أيه .. يقومو و يصحو مش وراهم غيرها .. أحب أقولو يا مان العربيه بي اللي سيقها مش بي نوعها #just_سطور

الأنوثه الطاغيه

بضحك أووي ..لما بلاقي بنات بتقول عن نفسها : أنا الأنوثه الطاغيه و الضحكه الجامده اللي مالهاش زي .. و كم أنا جميله و يا بخت اللي هيتجوزني .. و في الأخر هي مكس البطه السوده و الفيل الأزرق #just_سطور

تونكش

عارف ممكن ترتاح إمتي .. لما تبطل تونكش في دفاترك القديمه و ذكرياتك الكئيبه و الحزينه .. ساعتها بس هترتاح .. طيرو_بقي #just_سطور

انسان مقهور

الإنسان بيبقي مستحمل ضغوط و كبت و مشاكل و دوشه هنا و هنا جواه .. و يجي علي أهون سبب حتي لو حد نفخله في ودانه .. تحسه قنبله و مصدقت تنفجر و تطيح في الكل .. انسان_مقهور_أأأخال #just_سطور

عالم مادي

تبقي البنت جميله , شخصيه , مؤدبه و بنت ناس ويتقدملها شاب .. يسيب كل ده و يسألها سؤال واحد
الشاب : أنت بتشتغلي
البنت : ااه بشتغل
الشاب : الماذون أأأجدع ..عالم_مادي #just_سطور

أنا الفرحه

أنا الفرحه الطالعه من قلب بريء .. أنا الضحكه الجايه من سن بعيد .. أنا الحياه السهله من غير تعقيد .. أنا اللي بزعل كل ما زمني يسبقني و يروح لبعيد ... #just_سطور

خليك في حالك

نفسي كل واحد يخليه في حاله .. و ميبوصش ده عمل ولا ده ساوه .. بقولك أيه حالك بيسأل عليك روحله عايزك #just_سطور

السكوت

كتير بيبقي السكوت أحسن بكتير من لق لق علي الفاضي .. و كلام لاهيودي ولا يجيب .. و كلوا بيطلع فالغسيل #just_سطور

كراكيب

لما تلاقي كراكيب و نفسيات البشريه بتكتر .. أوعي تزعل نفسك .. حوط شريطه عريضه علي بوءك .. فقط تأمل في صمت #just_سطور

الكدبه

أحيانا بنكدب الكدبه و نصدقها .. عشان الحياه تمشي والعجله تدور #just_سطور

انسان

تفتكروا في أنسان سعيد أوي كده علطول .. أوعي يغورك كتر الصور والبوستات و الخروجات وأأت كذا و أأت كذا أبسلوتلي .. بس الأنسان بيحاول يجمل و يلون حياته بطريقته .. فا أذن يلا لونها و عيشها و يلاااااا #just_سطور

ضمان الحياه السعيده

عايز تبقي سعيد و يكون معاك ( ضمان الحياه السعيده ) .. قوم يلا وهات ورقه و قلم و أكتب فيها أحلامك و حاول تحقق اللي فيها ... ممممممم عملت أيه ?? تفتكروا في أمل ? #just_سطور

أنا اللي لسه

أنا اللي لسه .. انا اللي هابقي .. أنا اللي حلمي بيكبر بالزقه .. بس تكفي إني مصدقه و عارفه ..إني هابقي و أبقي #just_سطور

إصتبحنا

إصتبحنا يا ناس .. إصتبحنا يا بشر .. لا الجاي هيبقي نعناع .. ولا اللي فات كان رمان .. فا تكه تكه و نخدها واحده واحده #just_سطور

جزمتي حبيبتي

الجزمه .. أو أقولها بالجمع أحسن ( الجزم ) .. لييه دايما ظالمينها معانا .. يعني مثلا لما زيزو يطرقع لي فوفه و يطلع عينيها تقوم تقول عليه جزمه و جزمه ماتتقلعش من رجلي كمان .. و طبعا ياما اتشتمنا كلنا من ماما الحاجه بنفس الجزمه لما بنكون عاملين مصيبه .. طب لييه كدا .. احنا ناكرين للجميل
علي فكره .. مش الجزمه دي ياما شاليتك كتير و خرجتك و اتفسحت بيها .. يااه احنا وحششيين أووي .. يا حبيبتي يا جزمتي #just_سطور

 

 

 

ليه ممكن

ليه ممكن نقول مدام صوتنا مش مسموع .. نزعل نغضب نكسر .. برضه مش مسموع .. عايزينا نسكت .. عايزينا نضعف نكش نطاطي .. و نبقي نسخه صنم راضي #just_سطور