أغنيه (عم سلام الراضي )

عم سلام الراضي .. من مواليد الزمن الماضي

تاريخ ميلاده مكتوب بالحفر .. علي جبين الدهر

عمره بيكبر كل يوم شهور و سنين .. يهدو الصخر

جواه شاب في عز التلاتين .. واقف راسخ عند

عم سلام واقف يقول بصوت منبوح .. أنا أهوه 

تايه اه ما بينكم .. بس جوايا أنا حر

واقف دهري مقسوم .. بس هاقدر أقوم

صوتي للميدان نفسه يوصل

لازمن للظلم قصاده يخشع 

عم سلام جواه بركان هايرج جبال

هايرج كل اللي باع و خان 

بالقلم الجاف هيكتب صمد الميدان 

و يمسح شخبطه الندل و الجبان

و ينزل بورق الحيطان ألوان الوان

عم سلام بيقول للظلم أنا دمي فاير

و عمري مخلصش لسه و هفضل دايم #just_سطور

ونبي أهون

أغنيه ( بنتولد )

بنتولد و بيحطونا في لفه ..

و بيفرحوا بينا بأول خطوه بنمشيها و بأول لفه ..

و بنعيش و نشوف الدنيا ب ميت لفه و لفه ..

و لما نموت برضه بيرجعوا يحطونا في لفه ..

جيت أنا دنيتي بفرحه و بسمه مرسومه ع الشفه ..

أبويا و امي زقططوا بيا .. و لفو بيا أحلي لفه ..

حطوا أملهم كله فيا .. شبكوا إيديهم أكتر حواليا ..

نزلت أنا معركه الدنيا .. و لفيت لفيت ..

لفه في صغري .. لفه في حبي .. و شويه حلوين في باقي عمري ..

قالولي حاول تاخد منها قد ما تدي .. لا تحف ولا تفتري ..

حبيت حياتي أنا وسط الحشود ..

واجهت , إتعلمت , حشرت نفسي وسطهم ..

إتشبكت , إتبهدلت , يوم فوق و يوم فحت ..

دارت حياتي بكيفي .. و مشيتها بميزان تقديري ..

ضميري خليته قدامي .. شاغلني طول م أنا واقف بعيون مفتحه ..

عايش و هفضل عايش .. جوه دواير لافف داير .. #just_سطور

في ناس

في ناس عايشه عشان تتجرح
و ناس في الحزن تنزل تدفن
ناس ظلمهم في يومهم أساس
ظلمهم زي حجر الأساس
و ناس لدموعهم جوه عينهم مكان
دموعهم تفلق و تكوي اي قلب مهما كان
و ناس بشوات يدوسوا بالمداس ع الغلبان
و ناس و ناس قهرهم بيزيد اكوام #just_سطور

 

القهوه

القهوه مش مجرد شويه بن في فنجان .. القهوه هي المزاج و روقان الفكر و البال .. هي سحر نسيان قلبان الدماغ
#just_سطور

كخ كده عيب

كخ كده عيب .. أكيد كلنا فاكرين الكلمه دي .. ياما سمعناها و أحنا نونه لما كنا بنعمل حاجه غلط 

و لما كنا بنسمعها بالنسبه لينا كانت أكبر كلمه بنخاف و بنعمل حسابها كويس وهي داخله ودانه .. و كانت من أهم أدوات التهديد لكل حاجه غلط .. و مش كخ بس !! كان فيه العصايا و قرص الودان و التبريق .. و من أهم الأدوات و أسلحه التهديد الشبشب الطاير .. الطاير في الهوا و ينزل علينا يمين شمال فوق تحت و أحنا بقي و حظنا :( :(
بس علي الأقل كنا بنخاف و كتير كنا بنتعلم و نبطل الغلط .. صح ؟ !!

بس دلوقتي الدنيا عماله تحط علينا و تودينا و تجبنا و تبهدل فينا .. لا بتعلم و لا بنبطل الغلط !!!!

أنا اكتشفت ان لازم لنا شبشب ينزل فوق نافوخنا يفوقنا كل ما نقع و نعمل الغلط :) :) .. ساعتها بس هنبقي فله و ألسطه :)  #just_سطور

أغنيه ( أنا غنوه )

أنا غنوه ماشيه طريقها سارحه
سارحه في ملكوت الله جامحه
أنا غنوه حب و سلطنه قلب
مش غنوه هيء و ميء و درابوكه
أنا غنوه محفوره علي أوتارك
منقوشه زي اسمك علي كراسك
غنوه جوه مركب شقه البحر
مركب شراعه طاير فالت
أنا غنوه بكره و بعد بكره
نغمه انا من جمالها تتخطف
أنا غنوتي و غنوتك أنا
طايره من لحني لأبعد سما #just_سطور

ورقه مكتوب فيها حتي لو

أنا قررت أجيب ورقه طويله عريضه و أكتب فيها حتي لو !!!
حتي لو لحاجات كتيره في عالمنا ده .. حاجات زنقتنا و حشرتنا جواها .. حاجات و محتاجات أفشه و لابده من غير إستئذان
أنا قولت ..
حتي لو زاد نفاق البشر .. و عفن الواقع .. و ضحك الوشوش من ورا كره و غل النفوس ... هفضل زي م أنا
حتي لو زادوا الساده الممثلين فوق خشبه المسرح البشري .. و قالولي لازم أطلع أمثل عشان أقفش في جايزه اوسكار لأفضل منافقه و أفضل مخادعه .. من فوق الخشبه هانزل ... هفضل زي م أنا
حتي لو زاد إستهبال و الدلع المريء بتاع البنات .. و فوبيه الهيء و الميء اللي في كل مكان .. برضه مش هافتح أد الفيس بوك و لا هوافق علي أي برنس معرفوش حتي لو شبه حسن الرداد :) ... و هفضل زي م أنا
حتي لو زادوا اللي بيلعبوا كاندي كراش و الإكسيتنشن في شعر البنات .. و اللي بيحطوا عيل تحت الحجاب .. و اللي بيصوروا نفسهم في مرايه تواليت الحمام .. حتي لو زادو و زادو و زادو ..... هفضل أنا زي م أنا #just_سطور

إلحق

إلحق ... #just_سطور

شعر

صم بكم .. احنا يادوبك ابتداينا الكلام
صم بكم .. سدوا ودانا و ف بؤنا حشرو السكات
أعمي طاطي .. ماشي عكسي راسه تحت
أعمي طاطي .. تحت الأرض دافن غل
عبد كاشش .. سامع أوامر باصص شارد
عبد كاشش .. في كوم القهر واخد ساتر
راكع ساجد .. رافع ايده داعي ربه
راكع ساجد .. أمله طفل تايه رايد أمه #just_سطور

هل يجوز ضرب النمله بالشبشب ؟؟

سؤال محيرني ؟؟ !!!!
هل يجوز ضرب النمله بالشبشب ؟؟ .. أنا بتكلم جد .. ده سؤال عايزاله اجابه ؟؟ .. يعني لما أمسك الشبشب و أرزع النمله علي نافوخها ده يبقي حلال و لا حرام ؟؟
أنا فعلا بقول لنفسي دي في الأول و الأخر روح .. و أنا كده اللي موتها و فعصتها بشبشبي !!! .. و أوقات بحط نفسي مكانها و بتخيل نفسي ماشيه كده بتمخطر و بشرب عصير و لابسه اللي علي الحبل و ألاقي كائن ضخم نزل بالشبشب عليا و راح لازقني في الأرض و خلاني زي الكوبيبه .. احساسي هيبقي أيه ساعتها .. احساس زفت الصراحه :( :( .. أصله موتني موته مش استايل خالص
لا و كمان لما أموت النمله المفروض اني أدفنها مثلا و لا أتصرف فيها أزاي ؟؟
و لما بفكر بجد بتصعب عليا ما النمله دي ممكن تكون أم رايحه تجيب لولادها أكل , نمله رايحه تقابل أنتيمها ولا الجو بتاعها أو نمله رايحه الشغل مثلا .. ما كده حلال بقي ولا حرام ؟؟ !!
تفكيري في موضوع ضرب النمله بالشبشب ده زي لما أقلب الشبشب علي ضهره حلال ولا حرام ؟
لما أغني في الحمام حلال ولا حرام ؟
لو لبست الساعه في الشمال حلال ولا حرام ؟
بجد الأسئله دي بتخليني أفكر و نفسي أوصلها لاجابه ؟؟؟؟ #just_سطور

أغنيه ( أنا المضطر )

أنا المضطر أبعد عن حياتك و ساكت
بس مصدق ان ليا في ألف باب و سكه مكان يتساكن
أنا المضطر أغرق
بس عارف اني في يوم هأب و أطيح
أطيح في كل اللي يوقفني
أدوس علي أي حد كسرني
و قفت أنا ورا سور عالي متشعبط
جوايا صوت مكتوم متحشرج
أنا كنت قضيه خسرانه
مستني استئنافي ينصرني
ينصرني علي كوم أمالي المدفون
يرفعني من بؤره أحزاني لفوق
أنا المضطر .. بس عارف
اني مش هفضل مستني و ساكت #just_سطور

الفيس بوك خاروبه بني ادميه

الفيس بوك خاروبه بني ادميه
أيوه خاروبه .. مستغربين لييه ؟ !! .. أنا بقي هقولكم .. عارفين ليه أنا اللي هقولكم ؟؟ .. لإني أول واحده فيكم جالي داء الخاروبه ده :) .. طب هسألكم سؤال .. بتعودوا كام ساعه و إنتم حاضنين موبيلاتكم و الأي باد أير طبعا مش الفور إحنا جيل بتوع أخر حاجه .. لا و كمان الموبايل بقي جزء لا يتجزأ مننا ولازق فينا بغرا و أمير المصري ده عارفينه .. دي لو مراتك يا سحس مش هتعمل معاها كده :)  لائيم سحس ده .. المهم قولولي فرحتكم و تركيزكم بيبقي قد أيه و عينيكم راشقه جوه اي كومنت أو لايك ؟؟ و يا سلام لو ميسيتج ؟؟ بتبقوا فاتحنها علي سرعه 1000 كم في الثانيه .. طب زعلتو من كام حد بسببه ؟؟ .. و كام كابيل مكون من كيوت و كيوته فركشو مع بعض بسبب أيه ؟ أكيد بسببه .. طب إمتي أخر مره سألته و إتصلتوا بصحابكم ؟ أكيد أخركم كومنت ميس يو أووي قد كداااا .. و لا الصور بقي بنتصور مخصوص عشان ننزلها مش لا سمح الله للذكره مثلا .. و طبعا تجدني كل ما تكتر الكومنتس و اللايكس :) .. ما أكيد وش هيبسطني و يخلي ضحكتي من هنا لهنا  :) :) شوفتوا ضحكتي حلوه إزاي .. ده غير إن حياتك بقت بابليك بيتك , أكلك , لبسك , خروجك ده حتي فرشه شعرك بتتصور و هوبا داون لود و شير .. أنا عارفه إن ده بيبقي حركه لا إراديه مننا  :)  بس لازم نخف شويه مع إني أول واحده فيكم داء الخاروبه ده راكبني زي الجوست و نفسي أصرفه !!!! #just_سطور

فيلم فانتازيه عقلي

أنا بقيت مصدقه .. بس عارفه اني بكدب
حشرت نفسي أنا .. في فيلم فانتازيه عقلي
فيلم بطولتي أنا .. تأليفي أنا .. بس من دور العرض ماشيلتوش أنا #just_سطور

 

أغنيه ( أنا مين )

أنا ميين .. أنا من جوايا اتنين
واحد والتاني دايما خلف خلاف
أنا الخير ولا الشر .. الحب ولا الكره
أنا اللي بَدِي .. و لا اللي بحب أخد
أنا هنا أكيد لسبب .. أنا مش كماله عدد
أنا هنا و هفضل أدور .. أدور ما اللي جوايا متنطور
جوايا تايه و مش لقياله بر
جوايا عركه مبتخلسش
جوايا تناقض ميتوصفش
أنا مين .. أما من جوايا اتنين #just_سطور

أغنيه ( كلمه لبكره )

إكتب كلمه لبكره .. كلمه مش للذكره
كلمه تعيش و تكبر .. كلمه للنهار تتطلع
إكتب و عيش .. و إياك في الحزن تدوس و تزيد
تزيد و تزيد علينا .. و تزودها كمان علينا
ضميرك خليه قدامك .. و قول الخلف در لأحزانك
قولها و متخفشي .. قولها عشان تمشي
تمشي و تيجي كلمه لبكره .. كلمه للحياه هتبقي
هتبقي و تفضلك كلمه حلوه .. كلمه مش بالقول هتتقال
دي كلمه هتتسمع و تتشاف #just_سطور

الحياه

الحياه حب و ضحكه و شويه أمل في بكره #just_سطور

أغنيه ( مش بلبسي )

مش بلبسي هتيجي و تحاسبني
مش بلبسي هتحكم عليا .. و تأمر و تنهي
ماشيه طريقي و حره أنا
حره في نفسي و واثقه أنا
واثقه في ذاتي .. واثقه في طريقه حياتي
مش هتيجي توقفني .. و بقوه صوتك تكسرني
لا يا سيدي مش دي أنا .. ولا من نظرتك هكون أنا
أنا كيان و وجهه نظر
أنا نص الدنيا المنتصر
أنا حلم ماشي و واصل لبعيد
أنا راس مرفوعه لأعلي سما
أنا اللي هقنعك بحلمي في يوم
أنا اللي هيجيلي يوم و تشوف #just_سطور

أغنيه ( صندوق حياتي )

صندوق حياتي .. كله معاني
جواه حياتي .. جواه كل الأماني
بيتفتح ليخرج منه بدايه
بدايه لبدايه الحكايه .. و يرجع يتقفل لأغمق نهايه
صندوقي وحيد
مقفول بمفتاح مش ملكي .. و مالوش حتي تقليد
ما أحلامي حتي لو ملكي .. تنفيذها مش في الإيد
تنفيذها هيجيلو وقته .. إنهارده .. بكره .. بعدين
بس كله بإذنه .. كله بأمره
يا ربي خليك معايا .. خليك جمبي و ويايا #just_سطور

شريط متحشرج

حياتي محفورة علي شريط متحشرج .. محفوره و حالفه للدنيا تتظبط #just_سطور

أغنيه ( ميت أنا )

أنا اللي راح من كام سنه فاتو
أنا اللي م الشده إنتهت حياته
مت انا و سافرت بعيد
سافرت بعمري في صندوقي وحيد
طيرت بتذكره تروح متجيش
كان نفسي أحلم و أحفر ل اوصل
جوايا حلم أيوبي متكسر
كان نفسي أبني لدهري وتد
وتد ينغرس في أرضي ما ينخلع
قضيتك كانت قضيتي
طموحي , أهدافي و كمان حريتي
إنتهو برصاصتين و بخبطه قدم
عرفت إني ميت انا
عرفت إني للحياه مش راجع انا #just_سطور

أغنيه ( يا حجابي انتا تاجي )

في وسط دوشه زمني و ألاعيبه
توهت منا و مسيرنا نجيلك
توهت وسط كلام من كتره مصدقينه
كلام حاسينه , حافظينه و كمان شايفينه
وقفت أنا و بقوه قولت
بصوت عالي و بكل فخر
يا حجابي انتا تاجي .. انتا ميزه لذاتي
مهما كترو اللي بعدو عنك 2 , 3 , 4 و 5
و قالو عنك مش أساسي .. مش هو رمز إيماني
هتفضل انتا كمالي لديني .. و حبي لرب كوني
هتفضل انتا تاجي .. هتفضل يا حجابي #just_سطور