جدى

ماشي بجلابيته و عصايته ف إيده .. 

حافظ قرآنه و حاضن سبحته ب إيده .. 

قلبه لبن حليب و روحه طاهره ..

عُمره بيكبر و لسه إبتسامته واصله .. 

ييجي يدخل بيتنا تزيد البركه ..

و يلم شمل عيلتنا مع أول خطوه .. 

و ياخدني من إيدي بشويش لسريره ..

يحكيلي قصص و حواديت من أساطيره ..

بدايتها صلي علي النبي و بكل حنيه .. 

و يقولي يا بنتي إسمعي القصه ديه ..

أقوله يا جدى أستني لسه لي حٓبه ..

يقولي ماشي طب ناوليني بس الحبه ..

أقوم أجري أجيبهاله و أرجعله .. 

ألاقيه راح ف النوم من كتر تعبه ..

ده يامه وصاني علي أيامي اللي جايه ..

من غدر الزمان اللي يامه هيأسى عليه ..

و من قسوة سلاله البشر وصاني وصيه ..

أخد بالي من نٓفسي وسط قلوب معميه ..

و لقيت شريط حياتي قصاد عينيه ..

بيدور و يفرط من بين إيديه .. 

شهور و سنين عدت هي هيه ..

زي ما جدى شافهالى ف الوصية ..

قولت ياريت الشريط كان سٓف بيه ..

و فلاش باك يرجعنى طفله شقيه ..

ملهيه بلعبتها و فساتينها الوردية ..

والله واحشني يا جدى و حاسه بروحك حواليه .. #just_سطور

أسمعونا

( أسمعونا ) .. ده مقال بيجمعني بالكاتبتين الموهبتين شهد راشد و لبني المصري و ده اللينك يارب تقروه و يعجبكم .. رأيكم يهمني جدا

http://issuu.com/shahdh.rashed/docs/______________

تذَوقتُ مَوتي

راسي ع المخده و غمضت عينيه .. 

وفجأة الضلمه كترت من حواليه .. 

حاولت أفتح عيني لقيتني مش شايفه .. 

و ضربات قلبي زادت وصلت للميه .. 

روحي بتطلع من بين ضلوعي و طايره .. 

قلبي إتكوم و راح إتقبض قبضه .. 

و قلت لنفسي هو أنا كده خلاص رايحه .. 

يارب طب إستنى أنا كده مش جاهزه .. 

عشان خاطري ونبي طب ثانيه .. 

أروح أبوس إيد أمي الغالية .. 

و أحضن اخواتي و أطُل عليهم طله .. 

و أشوفهم و لو حتي أخر مره .. 

و أقولهم سامحوني لو كنت غلطت غلطه .. 

طب مش هكدب ولا أحور تاني .. 

و مش هاقفش ولا هبقي أناني .. 

و هسامح و هاعدي حتي للي جرحني .. 

و هسمع كلامك و أمشي علي خطاك .. 

باستغفرك ربي و بطلب رضاك .. 

ف لقيت الضلمه عماله تزيد .. 

و دمي بيجري و يهرب م الوريد .. 

جيت أبلع ريقي لقيت حلقي نشف .. 

و أقول الفاتحه و أنطق الشهاده لساني وقف .. 

ف لقيت كتابي قدامي مفتوح .. 

صفحاته خفيفه أوي وبالرصاص مكتوب .. 

قولت ونبي يارب طب أأكد عليه بالجاف .. 

دي الحسنات بالخط الخفيف و السيئات بالجاف .. 

ف لقيت كتابي بيتسحب من إيدي و يختفي .. 

و الضلمه من قصاد عيني بتقل و بتختفي .. 

ف قولت أشهد أنك يا إلَهي ربي .. 

و أنك يا مُحَمَّد حبيبي و عَوَضي .. 

أحمدك ربي إديتني فرصه عشان أعيش .. 

و هفضل علي سجادتك راكعه ساجده و ممشيش .. 

النَفسُ تُناجي

و أقولُ لِنفسي .. ستظلُ نَفسي

ذات نَفسي .. فلا تَنسي

وأستنجدُ بروحي .. لتداوي جروحي

فتأتي العواقبُ .. من حيثُ لا أدري

واُلملمُ ندمي .. بعبائهِ حزني

فَيَعلو بحري .. علي شط سكني

و أنصِتُ لفيروز .. مع رشفهِ قهوتي

فيشدو صوتها .. بأهواك بلا أملي

و أبحثُ عن حبي .. بين مفارق دربي

فتُصارحني لغه الورود .. وتقول لن يأتي

و أسيرُ بقدمي .. علي أشواك زمني

فيفرشُ لي بساطاً .. م الحنين يأخذني

و أمضي بين زكرياتي .. و سنين صُحبتي

فلم أجد إلا سراباً .. و واقع لغربتي

و أسابق قلبي .. لألحقُ بمشاعري

فأخسر عُمري .. ف البحث عن مطلبي

و أشتاقُ إلي موتاي .. و بصوتي أناجي

فيرد صوت صداي .. ترديداً يُؤلِمني

و أرفع يدي إلي السماء .. وأدعو يا ربي

فاغفر لي ذنوبي .. و من عيوبي طهرُني

و أخاف علي مستقبلي .. من أهوائي

فأعود إلي أرضي .. بطيب خاطري

و أردد لِنفسي .. ستظلين نَفسي

مهما زاد جرحي .. فلا تنسي #just_سطور

كرنفال السعاده

#كرنفال_السعاده #اتنشر_شعري_في_روزاليوسف_و_مجله_بينز_اندبوكس #و_ده_اللينك_بتاعهم بيت وشارع .. فراق روح

http://www.rosaelyoussef.com/news/88789/فراق-روح

http://www.pensandbooks.com/article.php?id=719

http://www.rosaelyoussef.com/news/88126

 

/بيت-و-شارع

 

 

فراق روح

أوضه ف مستشفي ب نيون فاقع ..

إسبوت كآبه علي كادر واقع ..

و بلاطي بيضا بتواسي اللي واقف ..

و مُمرض واقف جمب السرير ..

رايح يشيل جهاز الأكسجين ..

زحمه و وشوش و صويت مكتوم ..

عَمّي حضني و بصوت مهزوز ..

يا بنتي خلاص أبوكي إرتاح ..

و روحه راحت لمن لا يغفل ولا ينام ..

وقفت أنا و اختي حوالين سريره ..

بَصين له و جينا نمسك إيده ..

لقيناها ساقعه و م الحركه ثابته ..

حاولت أدفي إيده بإيدي ..

و قلت لنفسي والله يمكن ..

ده يبقي كابوس ولازم أفوق ..

ف لقيت ناس و دَفنه و عزا ..

و وشوش حزينه و عيون دامعه ..

بكيت بكيت و رجعت بيتنا ..

بَصيت في سريره لَقيته فاضي ..

لقيت سبحته و نضارته الرمادي ..

بس ريحته لسه ف قميصه الفضفاضي ..

فَحسيت إنه واحشني مع إني ..

بحس بطيفه و روحه بتلامسني ..

رَحمك ربي يا أبي و يا حبيبي ..

رَحمك يا من تداوي حنيني .. #just_سطور

بيت و شارع انتشرت ليا في روزاليوسف

الحمد لله حاسه بي احساس غريب .. بس مبسوطة جداً جداً اتنشر ليا شعر بالعامية ( بيت و شارع ) وده اللينك 
http://www.rosaelyoussef.com/news/88126/بيت-و-شارع

بيت وشارع

حيطه سد ف نهايه شارع ..

ورق شجر علي جمب واقع ..

و عربيات راكنه بعجل نايم ..

محلات و بيوت لونهم باهت ..

و ناس ماشيه وشوشهم كالحه ..

و الشمس بَخَلِت عليهم بضوئها ..

خايفه أقرب ولو خطوه ..

مع إني هاموت من جوايا و أرجع ..

لنفس الشارع و نفس البيت ..

خفت أشوفها فسألت نفسي ..

هاحس بإيه و هيجري إيه ..

قلبي هيحن لعشره سنين ..

و يصفي من كركبه ..

شويه أيام دايبين ..

و قصاقيص ورق ..

في جيبي كانوا متبقيين ..

و حصل اللي حصل ..

و شوفتها لا قلبي دق ولا حن ..

ولاقيته بقي حتة تلج ..

لا بيسيح ولا عايز يتكسر ..

هي مابقتش هي ..

و البيت و الشارع ملامحهم تاهوا ..

دول حتي مبقوش يتحسوا ولا يتشافوا ..

يا خساره ده صح علي رأي اللي قالوا ..

إن فعلا اللي فاتوا ماتوا .. #just_سطور

ونبي لتفتكروني بالخير

ونبي لتفتكروني بالخير ..

و تِبقوا تجيبوا سيرتي ..

حتي و لو كل فين و فين ..

و متنسوش ليا وَقفتي معاكوا ..

حتي و لو كانت من سنين ..

قولوا كل حاجه و متنسوش ..

قولوا ده كان جدع أوقات ..

و بيندّل ساعات و ساعات ..

بس والله إبن الإيه كانت ..

أيامه لا تتنسي و لا من بعده تتعاش ..

قولوا ده كان رغّاي ..

و بيحب القهوه الزياده ..

و النسكافيه بالبندق كمان ..

قولوا ده كان بيكره النكد ..

و يخاف م الوحده و الفراق ..

قولوا كل حاجه و متنسوش ..

قولوا كان بيحب الأكل زي عينيه ..

مع إن عُمره ما بان عليه ..

قولوا ده كان عصبي و قماص ..

بس بيرجع يصفي مع كلمه أسف ..

و شويه محايله و إعتذار ..

قولوا كل حاجه و متنسوش ..

أد إيه كان بيحب عيلته و بالذات أبوه ..

أد إيه قلبه شاب و عجّز ..

من بعد فراق أبوه ..

قولوا بس إوعوا تبكوا و تزعلوا ..

و إفتكروني بالفاتحه و الدعاء بالخير ..

ونبي لتفتكروني بالخير .. #just_سطور

تالت نشر و نثر ليا في روزاليوسف

الحمد لله اتنشر ليا النشر التالت في روزاليوسف

وده اللينك  

 http://www.rosaelyoussef.com/news/85307/%D8%A8%D9%86%D8%AA%D9%88%D9%84%D8%AF

مالك ؟؟

مالك زعلان ليه !! 

وِِِِِِشََّك بقي ليه مِتخشب !!

و ملامحك كلها تعابير !!

متلخبطه و اَلّهم أهو جِه شَرّف و راح سَدْها !!

طب قولي في حد مضايقك !!

في حد حَط هَمُه علي هَمّك !!

ولا إنت كدا بقالك كتير !!

تصدق مكُنتِش واخد بالي !!

إن عينيك بقت تايهه مننا !!

و جلدك كرمش أوي !!

ده حتي اللون الغامق زاد فيه !!

طب قولي ليه كدا !!

قَلبك قفلته بالضَبه !!

و مفتاحه خَبيته بإيديك !!

تصدق بَصيت ف مرايتك !!

عشان أشوف إيه حكايتك !!

شوفتك ف المرايه أنا !!

يااه ده إنت طلعت أنا !! 

و أتاريني بكدب علي نَفسي و مصدق !!

إني ف زماني مش هبقي شَبهك #just_سطور

تاني نشر في روزاليوسف

Mai Mahmoud Tawoos shared a link via ‎بوابة روزاليوسف‎.

13 minutes ago

الحمد لله تاني نشر و نثر ليا اتنشر في روزاليوسف .. انا منشكحه انا مبسوطة الحمد لله  

بندهلك

www.rosaelyoussef.com

بندهلك ياريت تسمعني أصلي مبقيتش حِمل المحايله

كتير

كتير

مبعرفش إني في الحقيقه فاهمه

وباخد فوق دماغي و برضه بفضل ساكته

و أهي قاعده !!

كتير

ناس باعوني برخص الملاليم و النِكله

و راحوا إشتروا رُخص غيري بكل بجاحه

جاتكوا واكسه !!

كتير

إتشال و إتحط عليا

و ضهري حَمّل و عَبّا لحد ما عَمل أُتبه

و أقول يارب راضيه !!

و كتير

قلبي م الحقيقه إتكوم و كرمش

مبقاش حاسس من كتر ما قابل و إتشوش

أه يا زمن الحَمَل فيكي بيتفرم و بالمداس بيتداس و ينهرس !! #just_سطور

أول نشر ليا روزاليوسف

يا جماعه اول نشر ليا في روزاليوسف .. انا مبسوطة اوي اول خطوه لنجاحي و انطلاقي بقي ..#باركووووولي ؛) http://www.rosaelyoussef.com/news/84954/حياتك-هى-حياتى

حياتك هى حياتى

www.rosaelyoussef.com

حياتك هي .. حياتي نَفس اللي راح .. نَفس اللي آتي

و أقول لِنفسي

و أقول لِِِنفسي .. سأظل َنفسي .. ذات نَفسي .. فلا تَنسيِ #just_سطور

بندهلك

بندهلك ياريت تسمعني

أصلي مبقيتش حِمل المحايله

هتكلم و أفضفضلك بصوت متلخبط 

عشان هدوءي بقي مُزعج متعفرت

أنا زهقت من كلامي مع نفسي

أنا زهقت من سكوتي و يأسي

و خبط دماغي ف الحيط 

و أديني كرهت .. 

كرهت صوت بكايا في لِيلِى

كرهت طعم دموعي و ياويلي 

و أديني جبت أخري ..

م أنا قولتلك أنا علي أخري

و جايلك دلوقتي ف ياريت تسمعني #just_سطور

نَفسي عزيزتي

نَفسي عزيزتي

نِفسي تخاصميني و أخاصمِك

و نِبعد حَبيتين حلوين

ترتاحي مني و أنا كمان أرتاح منِك

و نعيشلنا و لو ساعتين

يا شيخه مزهئتيش

حِلِي عن نافوخي إلهي يباركلك

ده أنا عُمري مش فاضله كتير #just_سطور

حياتك هي .. حياتي

 

 

حياتك هي .. حياتي

نَفس اللي راح .. نَفس اللي آتي

همومك , أفراحك .. كلو راح و آتي

حُبك الأولاني .. و متقوليش اللي فات مات

ده عايش جواك .. بتفتكره بيت الحين و الآت

مدرستك القديمه .. و البلاوي اللي فيها

مرحله إبتدائي .. و عُلَق إعدادي

دَمك اللي كان يلطش

صُحابك اللي غدروا بيك

أسبوع مصيف كل سنه

صوت فيروز مع فنجان قهوه

ضحكه طلعت غلط وسط عَزا

طلعت بالغلط بس أهي ضحكه

شغلك اللي مستحمله بالعافيه

شريك حياتك اللي جه أو مجاش

عُمرك اللي بيجري بالمشوار

نهايتك في صندوق بين أربع خشبات

و هتبقي مجرد جته تحت التراب

نفس اللي هيزعلوا عليك .. نفس اللي هيبكوا عليك

هما هما اللي الدنيا هتاخدهم لبعيد #just_سطور

 

 

أنا المواطن

أنا المواطن .. و ليا الحق أتواطن في حته مني

مش من حقك تبعدني , تأسرني ولا إيدك علي بؤي .. و تخرسني

عايزنّا نقف .. نستني ورا طابور مالوش أخر

عايزنّا نعيش عبيد .. و نموت برضه عبيد 

ما تحاولوش ..

خَليتو غُلبنا شفاف .. لا يتشاف و لا يتأري

حتي قلوبنا بقت ساقعه .. مش حاسه حتي بوجعنا

ماتحاولوش ..

إحنا جيل مش عيره .. إحنا اللي كتبنا السيره

إحنا اللي هنقول للظلم .. لأ

و بالفُم المليان .. هنخلي كل المسدود يتفك #just_سطور

 

 

 

الكلام .. !!

  

أنا

 

أنا .. الحاجه الحلوه اللي دايماً جايه متأخر ..

أنا .. الشخص المناسب اللي بنقابله ف نهايه السكه ..

أنا .. أكله جامده بعد جوع كافر ..

أنا .. طفل وصل حضن أمه بعد تسع شهور ..

أنا .. الإسعاف بصوت سارينه و برضه جايه متأخر ..

أنا .. الدمعه اللي نزلت بعد ضحكه و ضحكه .. 

أنا .. شويه زكريات و قصاقيص ورق متبقيه في جيبي .. 

أنا .. فيلم قديم لسه بشوفه و بيبكيني .. 

أنا .. كلمه إحنا عملنا اللي علينا بس للأسف ده قَدره .. 

أنا .. شِهاده بنطقها بين شفايفي قبل م أقابل ربي #just_سطور

 

 

أنتَ الأفضل يا صديقي

 

يا نفسي كوني متفائله

أنا مش هكدب عليكوا و هقولكوا حقيقه بقت فيا .. 

أنا أوقات كتير ببقي مش متفائله .. و تفكيري مش إيجابي .. 

بقيت أشوف الضلمه دايره كبيره حواليا بتلف بيا .. و أنا وسطها و لونها غامق أوي مَبتفتحش .. 

بس بقعد أقول لنفسي ما اللون الغامق ده مش بإيدي و لا بمزاجي .. ده م اللي بشوفه و اللي بيحصل ليا و لغيري كمان .. و كل م السكه تِفتح و أقول هَتروق و تِحلي ترجع تتسَد م الناحيه التانيه .. 

ده أنا أوقات كتير مابلحقش أفوق م الزعله تيجي الزعله التانيه تلاقيني أصلاً زعلانه و مش حِملها .. 

بس أرجع و أقول لنفسي أخرت السواد ده إيه ؟؟ .. أكيد مش هَيقلب بامبه وأنا ف الدايره الغامقه ديه .. ولا الكون هيركن علي جمب مستنيني لحد ما أفوق من غيبوبه الضلمه دي !! .. 

أكيد في حل .. يا نفسي مش هتفضلي كده .. لازم تفوقي .. إنتي مش لوحدك .. الناس كلها بقوا كده و فيهم اللي مكفيهم و مش نقصاكي أصلها .. 

فا أنا قررت أصالح نفسي .. لحسن تعبتها معايا أوي الفتره دي .. و ظلمتها كمان .. و هي مش ملكي .. دي ملك اللي خلقها .. و أنا محفظتش عليها .. 

فا يا نفسي أنا أسفه جداً .. متزعليش من حماقتي و غبائي !!

يا نفسي كوني سعيده .. و حاولي تتأقلمي وسط ضلمه زمانا !!

يا نفسي كلنا لها .. هنعيشها بحلوها و مُرها !!

يا نفسي كوني متفائله #just_سطور

أنا ..

هو ليه ؟؟

هو ليه ؟ .. يوم الجمعه وقته بقي قصير و البركه قلت فيه !!
هو ليه ؟ .. الكلمه الحلوه شحت مبقيتش بتتقال ولا بتتسمع !!
هو ليه ؟ .. العُمْر بيجري مننا و الأيام فَرَطت من بين إيدينا !!
هو ليه ؟ .. الحب خاصِمنا و بقي ماسخ مالوش طعم ولا لون !!
هو ليه ؟ .. الصحاب مش بيظهروا إلا في الشدايد !!
هو ليه ؟ .. طعم الشاي بلبن مش زي زمان !!
هو ليه ؟ .. الضحكه بقت مُصطنعه مفيهاش روح !!
هو ليه ؟ .. كل حاجه بقت غاليه إلا إحنا يا بني أدمين !!
هو ليه ؟ .. تفتكروا ليه ؟ .. العيب مننا ؟؟ .. إسألوا نفسكوا ؟ .. #just_سطور

رساله !!

سنَظَل ننتظر رساله لن تأتي يوماً .. بلا أملي !! #just_سطور

جت الحزينه تفرح مالقتش للواتس اب مطرح

أنا مش فاهمه إيه لزمه القلبان الي حصل ده كله من إمبارح .. !!

كل ده عشان خاطر سي السيد الواتس اب إتعطل حبتين .. قامت الدنيا و ماقعدتش .. و الفيس بوك كله إتقلب بوستات إستنجاد و مطالب لرجوع الواتس اب .. و شتيمه في الواد مارك ..

 يا حرام للدرجه دي مش عارفين تعيشوا من غيره !! .. بصوا أنا عارفه إنه برنامج مهم و سهِّل حاجات كتير علينا .. بس بسببه إتغيرنا إحنا .. أيوه إتغيرنا مسغربين ليه .. يعني كل الي يهمكوا إن الواتس اب يرجع !! طب ليه ؟؟ .. مهم أوي كده .. هتقولولي أكيد مهم ... !!

هقولكم أنا بقي إنه بسببه نسينا نسأل علي بعض بجد .. و نكلم بعض .. و لما بنوحش بعض بنقضيها واتس اب و هاي يا بيبي ميس يو أوي .. و بس علي كده .. و طبعاٌ اللاست سين ياما عمل مشاكل و قفش و فركشه بين الكابيلز .. طب ليه كده ؟..

أخر مره كلمتو صحابكم كان أمتي ؟؟ قولولي .. ده أنا فاكره أيام ما كانت دقيقه الموبايل بجنيه و نص كلنا كنا بنسأل علي بعض .. و كله كان بيكلم كله .. و مكانتش الناس بعيده عن بعدها كده .. و كله كان ألسطه .. فين الأيام دي بجد ؟؟ و حشتني جداً ..

عزيزي الواتس اب أنا قافشه عليك و زعلانه منك بجد .. أأه مَنكِرش إنك إمبورتند .. بس بسببك نسينا يعني إيه نسأل علي بعض !! .. نفتكر بعض !! .. نسينا يعني إيه صحاب و إهتمام و عشره سنين .. يا خساره #just_سطور

كفنا = فرحنا

إحنا ف زمانا بقينا بنتلف ف كفنا .. قبل م نشوف فرحنا #just_سطور

يا بلد

يا بلد بايعه أغلي ما فيكي .. و دايسه علينا بالأقوي
أنا قلم حبره خلص و خطوطه شفافه .. لا تتشاف و لا بتتإري
أنا عيون بقت مقفله .. و صوت مكتوم منتهي #just_سطور

 

#شنب #شنبو #شنبه

#just_سطور

يا ...

يا راضي بالهم .. و هو لا طايقك و لا عايزك

يا مستحلي البكا .. و نسيت للفرح عنوان و مطرح

يللي خليت الشكوي عاده .. و بعدت عن ربك و سجده العباده

يا عم فك التكشيره .. دي ملامحك كلها بقت مكرمشه و نيله #just_سطور

 

شوفت هيفا .. و تنحت أنا بقي !!

عايزه أحكيلكم علي موقف حصلي من كام يوم كده .. 

أنا كنت داخله فيلم لاموأخذه في سينما نايل سيتي أنا و منال أختي .. و بعد ما حجزنا و داخلنا و الراجل قعدنا و كلو بقي قشطه بعد ما ظبطنا البوب كورن و الشيكولاتات و الكانز لزوم السينما و الفرجه بقي .. 

بدأت الإعلانات ترف ورا بعضها .. ف إبتاديت أنا و منال بقي شو التصوير و سيشن بتاع كل خروجه .. بس مكناش إحنا بس اللي بنصور نفسنا والله .. كان في كابيل مكون من كيوت و كيوته جمبنا شغالين صور و الفلاش شغال تك تك و الحب و الهيام علي أخره .. و ورانا كان في شويه عيال صغيرين عمالين يتنططو و ياكلو و يشربو و يرغو حاجه صداع م الأخر .. و الناحيه التانيه كان في جروب بنات و ولاد قاعدين مش مركزين في حاجه و ماسكين موبيلاتهم كالعاده مستنين لاموأخذه .. و بقيت السينما نايمه و باصين ف السقف مبحلقين ..

لحد الحظه الحاسمه تاتاتاتاااه .. و إعلان حلاوه روح إشتغل يا معلم و بعد ما كانت السينما كلها رغي العيال و فلاشات الكاميرا و صوت نوتيفيكاشنز الواتس اب .. كلو بقي هسسس و بدأت مرحله التركيز و التناحه اللإراديه ..

كان كلو منفصل عن العالم الخارجي لمده خمس دقايق فقط .. لحد ما أنتهي الوقت و رجعنا لأرض الواقع .. !!
ساعتها بصينا أنا و منال لبعضنا ب إذبهلال و الفشار ف بؤنا و منطقناش ب ولا كلمه .. و حسينا إن في مركبه فضائيه هبطت ع الأرض كتمت صوتنا و أنفاسنا ..
فقولت أبص ع الناس حواليا أطمن عليهم برضه .. لاقيت الولد اللي كان عمال يحب في الكيوته بتاعته رماها و ماطط بوزه قدام شويه شويه هيتلزق وشه ف الشاشه و الله .. وهي جمبه شبهنا أنا و منال بظبط .. و العيال الصغيرين تنحو يا حرام .. و الولاد و البنات سابو موبيلاتهم و واتس ابهم .. !!

فقولت بيني و بين نفسي هو أيه اللي أنا شوفته ده .. إذا كنت أنا بنت و تنحت كده أمال الرجاله تعمل أيه ؟؟ !! .. و حاسيت إن كلمه لاموأخذه مطلعتش أسم فيلم دي طلعت كلمه مفروض تتقال لهيفا نفسها .. لاموأخذه يا هيفا كده كتير علي أعصابنا والله .. لييه كده بس .. من فضلك إرحميا يرحمك ربنا .. ده إحنا غلابه يا إستاذه .. :) :) #just_سطور

و أقول ..

و أقول .. #just_سطور

إحنا ليه بنخاف م الموت ؟ !!

إحنا ليه بنخاف م الموت ؟ !!
بينكم و بين نفسكم مسألتوش عقلكم و قلبكم السؤال ده .. إحنا ليه بنخاف م الموت ؟؟ .. 

تفتكرو ليه ؟؟ خايفين من لحظه الموت نفسها ؟ .. و لا اللي هنشوفه و نحس بيه بعد خروج روحنا ؟ .. ولا ظهور كشف حسابنا و نتيجه سنين عشناها ؟ .. و الأهم من ده كله خايفين من سؤال و إستجواب رب الكون لينا ؟؟ .. و كتاب حياتنا كله هيتفتح قصاد عينينا !! ..

طب مدام إحنا خايفين و عندنا إحساس بيقبض قلوبنا و يعصر فينا عصر .. ده معناه ان جوانا إيمان مهما كانت درجته .. يعني المفروض مانخفش أوي كده !! .. بس أرجع و أقول ان الإنسان خطاء و أكيد جوانا ذنوب كتير برضه !! حتي لو بتبقي غصب عننا و ده ليه حسابه ..

مع إني عارفه ان الغلط و الصح ف زمانا ده بيبقي نسبي .. و كل واحد بيقدر تصرفاته من وجهه نظره و ب إللي شايفه و يترجمها جواه فتطلع علي ورقه مكتوب فيها يا عم إنتا كده صح و زي الفل مالكش دعوه ب أي هري حواليك .. تمام كده يا باشا دوس و عيش ده اللي زيك إنقرضو يا جدع ..
و حتي لو طلعت الورقه مكتوب فيها غلطان .. من ساسك لراسك غلطان .. هتدي 100 عزر علي 100 تلكيكه و تقول إن الله غفور رحيم .. و الأعمال بالنيات .. و أنا مكنش قصدي والله .. أنا نيتي خير و زي الفل .. أكيد ربنا هيسامحني و مش هتحاسب .. و ترجع تحط راسك ع المخده و ضميرك مرتاح و كله ألسطه !! 

بس أرجع و أقول لو أنتم لسه خايفين م الموت يبقي إحنا كدا تمام و ضميرنا لسه شغال .. صح ؟
طب ليه منبوصش للموت بنظره تانيه ؟؟ أه بنظره تانيه .. مش إحنا عارفين إن الدنيا فانيه .. و الأخره هي حياتنا الابديه
و في حاجه حلوه أوي برضه غير ان الفردوس كلها نعم و جمال و حور عين و بحور عسل و خمر لا يسكر .. إننا هنقابل كل اللي فارقونا ف دنيتنا و وحشونا و كنا نتمني حتي نسمع صوتهم أو نحس ب نفسهم حوالينا أبوك , أمك , زوجك أو زوجتك ..
بس أنا عايزه أسألكم سؤال أنا عارفه ان الأب و الأم أكيد أهم شخصين هنبقي عايزنهم معانا في الأخره و منقدرش نستغنا عنهم .. السؤال هنا بقي ؟؟
هل يا فلانه تحبي إن جوزك و شريك حياتك يبقي هو هو جوزك برضه في فردوسك ؟ .. و لا ساعتها هتحبي تغيري و تجربي حاجه كده مكس تركي ايطالي برازيلي أسباني مضروبين ف خلاط و يطلع منه شوب فخفخينا اللي هوه
و السؤال برضه ليك يا سهن انتا .. تحب أم العيال تفضل برضه هي هي ؟ .. و لا نضربلك كوكتيل ف الخلاط حاجه كده علي زوقك .. إنتا تأمر يا باشا 

شوفتو بقي ان الجانب التاني م السؤال طلع ليه مميزات .. و إننا لو حاولنا منغلطش و لا نغضب ربنا و نشغل ضميرنا هنرتاح و نتبسط في أخرتنا
ف نصيحتي هقولها لنفسي قبل ما أقولهالكم ما تغلطش في حد و حط نفسك دايما مكان إي حد ممكن تجرحه أو تأذيه , و خلي ربك قصادك في كل أفعالك , بص للي أحسن منك في إيمانه و خليك أحسن منه , متقولش أنا بعدين هابقا أحسن خليك كل يوم أحسن م اللي قبله .. أوعي ترجع لورا .. عامل الناس زي ما تحب إنتا تتعامل .. أذكر ربك و حبه أوي عشان هو كمان يحبك .. و ساعتها مش هتخاف تقابله .. و هتبقي إنتا اللي بتجري تروحله #just_سطور

أوعي تتغر

أوعي تتغر ف نفسك .. لتاخد شالوت و كف
و ساعتها تقع زي الشاطر .. و مايتسماش عليك يا بأف
و يجرو عليك و يقولو .. من ده بكره بقرش
أنا جايه أقولك و ألحقك .. قبل م السكينه تسرقك #just_سطور

 

القسوه

قسوه الجروح علمت في قلوبنا غرز و خطوط متخاصمه
و كتر البكا حفر في وشوشنا بحور ساقعه و بارده
و ألمنا رجت فينا رج موتت حتي احساسنا
ف يا عالم ايه هيفضل فينا من يوم ما اتولدنا و جينا #just_سطور

 

الضحكه

الضحكه مجرد سنان باينه وسط وش عيونه دامعه !!
و كرمشه الوش تقول معليش دي مش أخر ضحكه جايه ... #just_سطور 

 

الحلو ما بيختلفش عليه اتنين !!

إبسط نفسك

إشتري شيكولاته قد كف الايد وكلها لوحدك
إمشي في الشارع إيدك في جيبك و إتنفس براحتك
هات ايس كريم في عز الشتا تحت المطرا
إسأل نفسك عامل ايه ؟؟ و جاوب عليها و قولها الحمد لله :)
كلم حد مكلمتوش بقالك كتير كان واحشك
بوص للي أقل منك و إحمد ربك
حوطي ميك أب حلو و صوري نفسك صوره حلوه و إغمزي للكاميرا ;)
إنزل الجيم يا برنس و إظبط الفورمه  ;)
روح في يوم مدرستك القديمه
إعمل أكله حلوه نفسك فيها
هات ورقه وإكتب فيها بحبك و إديها لنفسك  ;)
سرحي شعرك و إظبطيه بلاش كحكه الفتاه المتشائمه
إلبس اللي ع الحبل و إخرج خروجه جامده مع صحابك القدام
إشرب قهوه ب بن محوج مظبوط في فنجان من جوه النيش المركون
إخرج , إضحك , إجري , غني , إرقص , إنكش شعرك , إعمل إي حاجه كل ما تحس إنك مكتئب متعكنن متنرفز .. المهم إنك تبسط نفسك :) :) يلا بقي #just_سطور

مفيش !!!

أوجع إجابه هي مفيش .. لسؤال بدايته كلمه مالك ??
و تحس بيا ليه و أحس بيك .. بدل مفيش هي الأكيد !! #just_سطور

 

روميو الندل

لما روميو فاتها و غاب .. علمت جولييت انها موكوسه حظها فاكس مثل كل البنات #just_سطور